Yoshlar ittifoqi kashf qilgan yoshlardan biri Shohruh Haydarov haqida

Bugungi kunda mamlakatimiz ijtimoiy-iqtisodiy, siyosiy jihatdan jadal qadamlar tashlanmoqda va turli sohalarda islohotlar olib borilmoqda. Shuningdek, yoshlarga qaratilgan e‘tibor va yuksak ishonch mamlakatimiz ijtimoiy hayotida alohida ahamiyat kasb etadi. Buning birgina misoli davlatimiz rahbari Sh.M.Mirziyoyev tomonidan 2017-yil 30-iyun kuni bo‘lib o‘tgan "Kamolot" yoshlar ijtimoiy harakatining IV Qurultoyida tashkil etilgan O‘zbekiston yoshlar ittifoqining tashkil etilganligidir.

Ma‘lumki, o‘ziga millonlab yoshlarni birlashtirgan, millionlab yoshlarning hayoti va kelajagiga bevosita bog‘liq bo‘lgan Yoshlar ittifoqida vatan ravnaqi uchun o‘zining samarali faoliyatini olib borayotgan yoshlar talaygina.

Ana shunday yoshlardan biri, qashqadaryolik Shohruh Haydarov ham yosh bo‘lishiga qaramay bir qancha yutuqlarga erishib kelmoqda. Faoliyatining ilk damlarida uni ko‘pchilik Qashqadaryo viloyat Kengashi “Online klub”ining faol a'zosi sifatida tanishar edi. U hozirgi kunda ham Qashqadaryo viloyatida o‘tkaziladigan ko‘plab tadbirlar, festivallar va ko‘rik-tanlovlarni omma e'tiboriga taqdim etib kelyapti. Uning yetakchilik qobiliyati uni har jabhada jonbozlik ko‘rsatishga undadi. Mana shu qobiliyat uni qisqa davr ichida O‘zbekiston yoshlar ittifoqi Qashqadaryo viloyat kengashi Press klubi yetakchisi darajasiga ko‘tardi.

Quvonarlisi shuki, ayni damda Qarshi axborot texnologiyalari kasb-hunar kollejida tahsil olayotgan Shohruh Haydarov Qashqadaryo viloyatidagi barcha yangiliklar va xabarlarni shahrimiz aholisi uchun yetkazishda eng tezkor va zamonaviy telekanallardan biri "Qarshi" teleradiokanalida faoliyat yuritib, uning tarkibiga kiruvchi "Nasaf FM" radiosi hamda "Nasaf TV" kanalining mehnatkash, o‘z ishing fidoyi insonlari bilan hamohang tarzda ko‘plab tele va radiodasturlar tayyorlab kelmoqda.

Shohruh hozirgi faoliyatidan kelib chiqqan holda, albatta, jurnalistika sohasida tahsil olib, bu sohaning sir-sinoatlarini mukammal o'rganish niyatida. O'zining qalami bilan yurtimizdagi mashhur va iste'dodli ustoz-jurnalistlar qatorida bo'lishni istaydi. Jurnalist bo'lish uchun esa, kishidan barcha sohalarda yetuklik, teran fikrlash va aqliy mahorat talab etiladi. Shu bois, Shohruh Haydarovga bu borada tinimsiz mehnat va ijod qilishdan to'xtamasliklarini tilab qolamiz.

Murodjon Amirov, Yoshlar ittifoqi Qashqadaryo viloyat Kengashi faoli.