“Kun.uz” сайтида “Ёшлар Иттифоқини нега ҳамма ёмон кўради?”, деб номланган мақола чиққан эди. Сайтни ва муаллифни ҳурмат қиламан. Бироқ мақола мавзусига қўшилмаган бўлардим.
Ҳа, ҳеч бир ташкилот 100 фоиз зўр ишламайди, ҳатто вазирлику, қўмиталар
ҳам. Тан олиш жоиз, ўринли танқидлар бор. Ёшлар иттифоқи танқидлардан тўғри
хулоса чиқармоқда. Бироқ тизимдаги 1-2 та одам қилган хатоси учун бутун
ташкилотни ҳеч нарса қилмасликда айблаш ноўрин.
Ҳамма ёмон кўриши ҳақида тўхталадиган бўлсак, бу ерда урғу асосан facebook
ижтимоий тармоғидаги танқидий фикрларга берилган. Ҳа, тармоқда 3-4 та ўринли
танқидлар бўлди. Бироқ “Халқ билан мулоқот” гуруҳидаги танқидий фикрларга
эътибор берадиган бўлсак, уларда ким томонидан очилган ноаниқ инсонлар
томонидан танқид қилинаётганини кўриш мумкин.
Яъни ёшлар иттифоқи деган сўз ёзилса бўлди, у нима ҳақида эканини ҳам
ўқимай, оғизларига келган нарсаларни ёзиб ўтираверишади. Масалан, “qalampir.uz”
сайти “Расман: Ёшлар иттифоқи Энрике Иглесиаснинг концертига бепул таклифноматарқатяпти” хабарини ушбу гуруҳга жойлаштирди. Кўпчилик инсонлар Энрикени
Тошкентга олиб келишда Алишер Усмонов ҳомийлик қилганию, концертга чипталар
барча вазирлик ва ташкилотларга тақсимлаб берилганидан хабардор. Ёшлар
иттифоқини айби ўша тақсимлаб берилган чипталарни йил давомида фаол бўлган
ёшларга тарқатиб бергани ва буни facebook’даги саҳифасида эълон қилгани.
Ташкилот ҳар бир амалга оширган иши ҳақида ижтимоий тармоқ орқали ҳисобот бериб
бормоқда. Хўш айтингчи, қайси ташкилот ёки вазирлик чипталарни кимга тарқатгани
ҳақида тармоқ орқали маълум қилди? Мен кўрмадим, сиз кўрган бўлсангиз
хурсандман.
Охирги пайтда тармоқдаги “ясалма инсонлар” Ёшлар иттифоқини ҳақорат
қилиш билан чекланмай, ташкилотда фаолият юритаётган инсонларни ҳақорат
қилишгача ўтиб кетишди. Агар унга қўпол жавоб қайтаришса, яна ташкилот
ходимлари айбдор. Бироқ ҳеч ким ҳақорат қилаётган инсоннинг фикрларига
қизиқмайди. Эркак кишику, бунақа ҳақоратга чидаши мумкин. Бироқ кунига 10-12
соатлаб ташкилотда ишлаб, қайсидир ёшга фойдаси тегаётган айрим қизлар, уйида
боласига вақт ажрата олмай ёшлар билан ишлашишиб юрган аёллар учун бундай гапни
ҳазм қилиш осон эмас. Афсуски шундай пайтда бу аёлларни ҳеч ким ҳимоя қилмайди.
Аксинча унга қўшилиб ҳақорат қилишади. Шуми жамоатчилик назорати?
“Халқни пули”.
АЙРИМ одамлар шу жумлга ёпишиб олишган. Халқни пулини
еяпсизлар. Ташкилотдагиларнинг (ҳудудларда) ойлиги ўртача бир миллион сўмга ҳам
етмайди. Улар кунига 10-12 соатдан кам ишлашмайди. Туманлардагиларнику гапирмаса
ҳам бўлади. Ташкилот раҳбари кеча тармоқ орқали молиявий ҳисоботни эълон қилди.
Лекин одамларнинг топиб олган гапи битта: "Халқни пулини еяпсизлар". Хатто, Энрикенинг контцертини ҳам Ёшлар иттифоқи Халқни пулига олиб келганмиш.
“Ёшлар иттифоқи менга уй бермади”.
Афсуски, шундай инсонлар ҳам борки, Ёшлар иттифоқи ҳамма ёшларга уй бериши керак, деб тушунишади. Кимдир айтади “Мен
ижарада тураман, оилам бор, менга уй бермади”. Одам аввало ҳаракат қилиши
лозим. Ёшлар иттифоқи юртимиз номини дунёга танитган ва турли соҳаларда
муваффақиятга эришган уй-жойга муҳтож инсонларга уй беради уям текинга эмас,
кредитга. Бунда асосий мақсад фаол ёшларни рағбатлантириш. Кам таъминланган
оилалар учун Давлат арзон-уй жойларни қураяпти. Уйда ўтириб олиб менга ёрдам
бермади деб нолинишдан олдин, ҳаракат қилиш керак. Қизишиб кетган бўлсам узр.
Ижтимоий тармоқлардаги 10-15 одамнинг фикри бутун халқни фикрини билдирмайди.
Ёшлар иттифоқи Марказий Кенгаш раиси тез-тездан facebook орқали онлайн
мулоқот қилмоқда ва танқидларга жавоб бермоқда. Хўш, Республикадаги қайси
ташкилот раҳбари тармоқ орқали халқ билан шундай мулоқот қилмоқда? Мени
раҳбарини ёнини олиб, унга яхши кўринишга ҳаракат қилаётганликда айблашингиз
мумкин. Бироқ нега биз амалга оширилган яхши ишларни кўрмаймизу, фақат ёмон
томонига осилиб оламиз.
Бу фикрлардан сўнг, мени ҳам маддоҳликда айблайдиганлар кўпайиб кетар. Лекин,
“Ёшлар иттифоқини ҳамма ёмон кўради” дейишдан олдин ўйлаб кўрайлик, шу ташкилот
орқали қанчадан қанча ёшлар ҳаётда ўз йўлини топиб олишди.
Диққат билан ўқиганингиз учун раҳмат. Бу менинг шахсий фикрим ва
сизнинг фикрингизни ҳам ҳурмат қиламан.
Фурқат Юсупов.
Комментариев нет:
Отправить комментарий