Қашқадарёда “Ёшлар ва қонун” Республика кўрик-танловининг вилоят босқичи якунига етди

Қарши шаҳрида умумий ўрта таълим мактаби ўқувчиларининг ҳуқуқий маданиятини юксалтириш, уларни Ўзбекистон Республикаси Конституцияси ва бошқа қонун ҳужжатларига ҳурмат руҳида тарбиялаш, ёшларнинг эркин фикрлаш қобилияти ва нутқ маданиятини ўстириш, уларнинг фаол фуқаролик позициясини янада мустаҳкамлаш мақсадида “Ёшлар ва қонун” Республика кўрик-танловининг вилоят босқичи ўтказилди.

Танловнинг вилоят босқичида туман ва шаҳар босқичларида ғолибликни қўлга киритган 15 жамоанинг ўқувчи-ёшлари ўзларининг ҳуқуқий билимларини синовдан ўтказиш мақсадида Низомда белгиланган 4 шарт бўйича ўз чиқишларини намойиш этишди.

Танловнинг якуний натижаларига кўра, Қарши шаҳрининг “Фимеда” жамоаси 1-ўринни, Шаҳрисабз шаҳрининг “Адолатли ёшлар” жамоаси 2-ўринни ва Муборак туманинг “Ёш юристлар” жамоаси 3-ўринни қўлга киритди ҳамда “Фимеда” жамоасига танловнинг Республика босқичида иштирок этиш ҳуқуқи берилди.

Шунингдек, фаол иштирок этган жамоалар “Ҳуқуқ билимдонлари”, “Энг фаол жамоа”, “Энг зукко жамоа”, “Танлов кашфиёти”, “Энг билимдон жамоа”, “Ғалабага бўлган иштиёқи учун”, “Конституция билимдони”, “Энг яхши саҳна кўриниши” ва “Энг яхши видеоролик” каби бир қатор номинациялар билан тақдирланди.

Аҳрор Содиқов.